لماذا لا يمكن نسخ أقراص ألعاب جهاز PS4؟

ناس كتير أوي بتسألني مفيش إسطوانات PS4 منسوخة؟

الإجابة بكل بساطة لا مفيش طريقة ننسخ الإسطوانات بالشكل المتعارف عليه على إسطوانة تاني وخلص الموضوع ونشغلها على الجهاز، ولو عايز تعرف الأسباب بالتفصيل الممل إقرأ الموضوع للآخر.

هتقولي طيب مهو PS1 و PS2 ينفع ننسخ الإسطوانة عادي ببرامج ونشغلها على الجهاز وبرضو بعض إسطوانات Xbox 360 ينفع تتنسخ وتتلعب على الاجهزة إلي Drive بتاعها معدل.

هقولك كلامك صح لأنه ألعاب PS1 و PS2 وبعض ألعاب Xbox 360 كانت يأما على إسطوانات عادية CD أو DVD وتكنولوجيا الحماية فيها ضعيفة جدا مقارنة بإسطوانات Bluray

إيه هيا إسطوانات الـ Bluray دي يا هندسة؟

دي تكنولوجيا طورتها مجموعة من الشركات لتخزين أكبر قدر من البيانات على الإسطوانات بالأشعة الزرقاء بالنانومتر علشان كده نقدر نخزن عليها كمية بيانات ضخمة جدا ممكن توصل لـ 100 جيجا لكن إلي بيميز الإسطوانات دي الحماية العالية إلي ساهمت في الحد من قرصنة الألعاب والأفلام بسبب القدرة على تشفيرها بشكل معقد جدا ودي مجموعة من الشركات إلي ساهمت في تطوير التكنولوجيا دي.

Sony Corporation
Xperi Corporation
DTS
Hitachi-LG Data Storage
Intel Corporation
Koninklijke Philips N.V.
LG Electronics Inc.
Mitsubishi Electric
Oracle Corporation
Panasonic Corporation
Pioneer Corporation
Samsung Electronics Co., Ltd.
Sharp Corporation
Dolby Laboratories
Technicolor SA
Toshiba Corporation
Universal Studios Home Entertainment
The Walt Disney Company
Warner Bros. Entertainment
Lionsgate

طيب يا هندسة برضو انا مش فاهم يعني إيه تشفير وازاي برضو أنسخ الإسطوانة أنا عايز ألعب ألعاب ببلاش؟

بص يا سيدي من غير تعقيد التشفير ده زي لما تكون متفق مع واحد صاحبك على طريقة معينة تتكلموا بيها محدش غيركم يفهمها تضيفوا حروف زيادة تنقصوا حروف تعكسوا الكلمة ايا كان المهم محدش هيفهكم حتى لو بتتكلموا بصوت عالي، وده إلي شركة سوني بتعمله الصورة إلي تحت دي فيها تشريح لإسطوانة لعبة PS4 بيبقى فيها زي مفتاح مثلا شبه المفتاح ده.

51ea42e630d241e6c3e02743553d5cb69fe07f40c17975b09251ac2f70ff60c7

ونوع التشفير ده SHA-256 وده تشفير معقد جدا جدا جدا لفك تشفيره وممكن تجربوا تشفروا حتى حرف واحد على الرابط ده وتشوف شكله ايه.

https://www.movable-type.co.uk/scripts/sha256.html

طيب ازاي جهاز PS4 بيعرف اللعبة دي سليمة والمفتاح ده تمام ولا لا؟

بيبقى في قطعة إلكترونية قابلة للبرمجة والتحديث بتتخزن فيها مفاتيح فك التشفير وبتعمل عملية تأكيد على المفاتيح إلي جاية من الإسطوانة، ودي بتبقى على بوردة الجهاز وبعض التحديثات إلي بتنزل بتحدث القطعة دي بالمفاتيح الجديدة بتاعت الألعاب الجديدة إلي نزلت السوق أو إلي هتنزل.

وعلشان أفاجئك إسطوانات PS4 تم نسخها فعلا أمال الألعاب إلي بتتلعب على سوفتوير 5.05 دي إيه 😁 ؟

دي إسطوانات منسوخة لكن بشرط لازم يتم إختراق الجهاز نفسه تحديدا نواة نظام التشغيل ويتعمل حاجة اسمها Kernel Exploit نقدر من خلال الجهاز نفسه بعد إدخال الإسطوانة والجهاز يفك تشفيرها وتتفتح الملفات والفولدرات بتاعت اللعبة نحمل برنامج على ذاكرة النظام عن طريق ثغرة ROP إلي على المتصفح وننسخ ملفات اللعبة على هارد خارجي وبكده نقدر نشغلها من على الجهاز مباشرة من غير إسطوانة بطريقة معينة وده إلي حصل في ثغرة 5.05 ما هيا إلا إسطوانات منسوخة وتم عمل Patching ليها إنها تشتغل من الهارد علطول بس للأسف أي لعبة بتطلب سوفتوير أعلى من 5.05 مش هنقدر نشغلها علشان مفاتيح فك الشتفير مش موجودة ومفيش طريقة نقدر نبرمج بيها القطعة إلي في الجهاز علشان نشغل الألعاب الحديثة، وبرضو الأجهزة إلي على سوفتوير 5.05 مينفعش تدخل أونلاين علشان سوني بتجبر أي جهاز إنه يحدث لأخر نسخة لو دخل أونلاين وبكده تفقد ميزة تحميل الالعاب بشكل غير شرعي.